! حاجه م الحاجات

مشيت و طوفت

لكنى توهت

وسط المتاهه

و يالا العجب

لقيت نفسى

لكن يا ترى ؟

هى دى نفسى

و لا

كده و كده

حاجه تايوانى

متركبه

أو شخبطه

بايدين عيال

متعلمين الرسم

! ويا التهتهه

برضه مستنين

تأخدهم التوهه

ويا البدايات

و مسلمين نفسهم

للوهم

لكن السؤال

يا ترى بكره

حيبقوا

حاجه م الحاجات

! شوية معلومات عنى

لكل الاصدقاء والصديقات
لكل من يريد الاتصال بي
للصداقه
للتعارف
لابداء رأى
أرحب بكم

علي الايميل
modylive2004@yahoo.com
مع خالص محبتي

مبروك يا أهلي

مبروك لمصر وكل المصريين حصول الاهلي علي المركز التالت في بطولة العالم للانديه بعد فوزه علي كلوب امريكا 2 - 1 بهدفين للفنان ابو تريكه والي الامام دائما يا اهلي

نزار و المرأه

أريد الرحيل بأي قطار مسافر

فان حروب النساء بدائيه

كحرب العشائر

فقبل المعارك بالسيف

كانت هناك الأظافر

ما أروعك يا أستاذ الرومانسيه

"مدونة " خطوات

تم اليوم بحمد الله انشاء المدونه رقم اتنين ليا في عالم المدونات تحت اسم خطوات وسيتم نقل بعض البوستس من هذه المدونه الي مدونه خطوات حيث ستقتصر مدونة دنيا الكلام علي انتاجي الأدبي من الأشعار و الخواطر والقصص القصيره أما الموضوعات العامه الأخري ستكون في مدونه خطوات

عنوان

مدونة

خطوات

khatawat.blogspot.com

تعالوا زورونا

محمد فرج على يكتب : مطلوب عريس

تحيه ارق من النسيم العليل واعذب من ميه سلسبيل
ندخل في الموضوع علي طول ومن غير لف ولا دوران
مش ملاحظين يا جماعه ان الشباب اضربوا عن الجواز اليومين دول وكبروا دماغهم والمشكله كبرت وذادت عن حدها قوي وبناتنا بقوا قاعدين في قرافيصنا لحد التلاتين والخمسه وتلاتين حصره قلبي عليهم يا ريت تعملوا لنا باب عندكوا يكون عنوانه " مطلوب عريس" مساعده منكم لاخواتنا بنات حوا البيض الاماره والسمر العذارى والشقر بالمره ما لهمش نفس ولا ايه و مساهمه من عندى عندي كام عريس لقطه وضل راجل ولا ضل حيطه و يا بخت من وفق راسين في الحلال وعشان اثبت لكم ان الرجاله ما ماتوش فى الحرب ذي الدلعدي جيهان الغرباوي ما بتقول قطع لسانها من لغلوغه
شاب عنده 75 سنه من عينة الشاويش عطيه الله يرحمه يعني امورقوي وكله بلاستيك في بلاستيك من رموشه لغاية طقم سنانه ورجله والقبر يعنى الميراث مضمون
عاطل خريج تجاره دفعة 1985 ولسه مستني جواب القوي العاميه بعيد عنكوا وعن السامعين ربنا ما يوريكوا
ميكانيكي ساقط اعداديه 3 مرات وداخل علي الرابعه بس عنده ورشه وشقه وعربيه اخر موديل وشاليه في مارينا وبيأخد شاور في اليوم 3 مرات برضو يعني مش مشحم ومزيت علي رأي ميمي شكيب
وعلي بنات حوا اللي عايزين يستفسروا عن العرسان اللقطه دول يبعتوا لي ايميل بس باي باي

نشرت في جريدة اضحك للدنيا

المراسله وحرق الدم

زمان من عشر سنين كده كنت غاوي مراسله يعني ورقه و قلم و ظرف جواب و المراسله فيها الحلو والمر و اول جواب يجيلي كان من بنت بيئه من محافظة البحيره حتقولي جابت عنوانك منين اقولك سمعته في اذاعة مونت كارلو و يا ريتها ما سمعته كانت البنت بتشتكي من الوحده يا حرام وبتقول مستنيه منك جواب و تليفون صغنن منك طمني عليك المهم مع انها بيئه قولت ما اكسرش نفس البنيه و بعتلها الرد و اتصلت بيها بعد اسبوع اطمن عليها وعلي الجواب واحد يسالني جبت رقم التليفون منين اقوله البنت كان باعتاه مع الجواب يا ناصح و طبعا كان رقم تليفون البيت لان الموبايلات كانت لسه ما دخلتش بر مصر المهم ما اطولش عليكوا قولوا طول الجرس بيرن كويس قوي بس ايه ده صوت واحده عندها بتاع أربعين - خمسه و أربعين سنه و كمان بتتكلم بلهجه صعيديه عرفت بعد كده انها الست و الدتها لما دخلت معايا في وصلة ردح من اللي قلبك يحبها وهات يا سين وياجيم "انت عايز منها ايه "و "بتتصل هنا ليه" "وجبت الرقم ده منين " مع انه المفروض يكون اول سؤال" ولسه باقولها حضرتك هي اللي مديهولي ورزعت السماعه في وشى حته دين رزعه كاني نهبت مال النبي وسرطنت البلد والنائب العام بيحقق معايا والنهارده بتمر الذكرى العاشره لاول "حرقة دم في حياتى" جت متاخره مش

كده

نشرت في جريدة الجيل

محمد فرج على يكتب : معلم الأجيال بنجاوي

في جريمه فريده من نوعها قيدت بالمحضر 4968 لسنة 2005 ملخص الحادثه ان الاستاذ "عوض" 45 سنه مدرس باحدي المعاهد الازهريه بعد تعب يوم دراسي شاق و طويل غير الدروس الخصوصيه حس ان الطاسه خرمانه و عايزه تتظبط قعد يفكر حيروح فين حيروح فين مافيش غير شله الانس اداهم الو انتوا فين احنا في الصومعه تعالي لنا اوام ما كدبش خبر وراح وهو بيسابق نفسه لقي الشله كلها متجمعه بربطة المعلم من الاخوه سعيد "43سنه" و مهدي "32سنه" و عبد الكريم "52سنه" و محمد "68سنه" و كلهم فلاحين المهم كانوا مرتبين قعده المزاج تمام التمام و 100 فل و 14 و قدامهم الفحم المولع موهوج نار وعلي السجاده السجاير المعمره بالبانجو والحشيش و الصواريخ للاخوه اللي دماغهم مصفحه و ما بتاثرش فيها السجاير يعني مابتعمرش الطاسه و قعدوا يشربوا في بانجو و يضربوا في صواريخ لغاية ما الدخان ملا الصومعه اللي كانوا مشرفين فيها و لحظهم المهبب كان رجال النيابه العامه بحراسة رجال المباحث " يا نهار اسود" بيعاينوا منزل مجاور لمتهم فى قضية امن دوله و طبعا شموا الريحه المفحفحه و دخلت في نخاشيشهم و اقتحموا الصومعه و ضبطوا شله الانس نفر نفر و بمواجهتهم انهاروا واعترفوا واللي يقولك " الدنيا قاسيه يا باشا" "لازم نعمر الطاسه عشان نقدر نعيش" "الحياه تحب الفرفشه" "احنا صحاب مزاج وما نقدرش نعيش من غير مزاج" "الكيف مناوله مش مقاوله" شوفتوا التهييس والهرتله يا اخواننا ببلاش فلاحين و برغم ان النيل رواهم لكن الخير مش جواهم واتقبض عليهم و اتحبسوا علي ذمة التحقيق وادي معلمين الاجيال

نشرت في جريدة اضحك للدنيا

! فضيحه آخر فبركه

مش عارف ليه الناس بقت كلها كل واحد منغاظ من اي حد يروح يجيب له اي صوره من اي حته و يلعب فيها ببرامج الجرافيك ذى " الفوتوشوب" و" الفري هاند" و "الفلاش" و لو بنت يعملها راجل و لو راجل يعمله بنت يا حرام
وهوب يحط الصور دي علي النت مع كام قصه مفبركه برضو شييء لزوم الشييء و تبقي فضيحه فشر فضيحة اللحمه في السوق
و يا سلام لو يخده علي خوانه ويصوره فيديو بالمحروق ابو كاميرا ويلعب في الفيلم و يخليه آخر ثقافه و مسخريكا يا ويكا و طبعاً أنتوا عارفين المحروق ابو كاميرا انتشر قد ايه خاصة العده المكلبظه 6600 وكل الناس مشغله البلوتوث و ما ادراك ما البلوتوث النغمات و الرنات و مقاطع الفيديو الطازه اللي مليانه فضايح واللي معظمعها ان ما كانش كلها مفبرك و يا سلام او عندك صاحب صحفي او حتي معرفه تجرى عليه وتتقوله عاوز توزيع المجله يزيد يقولك في عرضك ترد بسرعة البرق عندي ليك فضيحه تشيب مع الصور النميسه والمانشيتات المولعه توزيع المجله يطلع في العالي والصحفي ما يصدق و ينشر و خلاص من غير ما يتاكد من الكلام ده و تبقي فضيحه علي مستوي الجمهوريه و ابعت ردود ياعم المفضوح و ابقي قابلني لو نشروا لك كلمه واحده
ليه ما نحبش بعض ونبطل شغل عيال كفايه نفسنه يا بشرمنفسنه ومسيكبه و مافوره أو عندها كوكتيل من التلاته!!

قطار العذاب في الدنيا الهباب

في يوم من الايام كنت مسافر القاهره وكانت المواصلات صعبه قوى فقررت اني اركب القطر لاول مره في حياتي و يا ريتني ما ركبته لانه من المدهش و العجيب ان القرن ال21 هل بنوره والآلفيه التالته اشرقت علي كل الدنيا لكن المسئولين عن س0ح0م او سكك حديد مصر مازالوا مصرين علي استخدام قطرات من عهد قدماء المصريين فقطرات الهيئه الميمونه عامة و خاصة القطرات التي تخدم محافظة المنوفيه التي لا اشرف بالانتماء اليها !! وحتعرفوا بعدين ليه اقل حاجه نقدر نقولها عليها انها ما بتحترمش ادميه المواطنيين فالقطر عباره عن علبه من الصفيح والخرده ما فيش بيبان ما فيش شبابيك وان وجدت فهى مفتوحه علي مصراعيها في عز زمهرير الشتا -حلوه زمهرير دى قوى- و مقفوله بالضبه والمفتاح في قيظ الصيف والسبب مش معروف ناهيك عن الحمالات ولا الكراسي فنادرا ماتجد حماله او كرسي سليم اما لمبات الاضاءه فكلها او معظمعها محروقه عشان الجو يبقي رومانسيا حالكا بعد الساعه 5 تيسيرا علي الاخوه الحبيبه والعشاق اما العلب اللي بيسموها حمامات اقل ما وصف ليها انها ما تصلحش لقضاء حاجة الحيوانات الاليفه او غير الاليفه ازاي يستخدمها الانسان اللي كرمه ربنا و احنا نهدر ادميته ونمرمغ كرامته في التراب ده غير الريحه اللي تزكم الانوف وتخلي جو القطر مسموم وربنا وحده هو اللي بعلم دي حمامات ولا من وسائل التعذيب ايام -صلاح نصر- مين صلاح نصر ده!!!ولما يتحرك القطر واللي غالبا ما بيقومش في معاده وتملي متاخر لانه شعبي و بسيط وبيركبه ناس شعبيين وبسطاء فيطبق المثل الشعبي اللي بيفول "كل تاخبره وفيها خيره" ويمشي الهويني ذى المزه لما تتدلع بس نقول ايه" العجوز لما يتدلع ذى الباب المخلع" لكن بس ده مش الباب هو اللي مخلع فالقطر كله ذي قطرات الاطفال اللعبه اللي بيركبوها بالميكانوو يا سلام علي الكلام الحلو الكميل اللي ينضف الودان ووصلات الردح اللي قلبك يحبها من البياعين اللي احتلوا القطر و بيتحفوا اسماعنا بما لذ و طاب من الشتائم مش كفايه حالة القطر يا رب هو ما آنش الاوان عشان نستغني عن القطرات دى و نستبدلها بقطرات جديده ونضيفه تحترم آدميه المواطن المطحون والمكافح عشان لقمة عيشهده السؤال اللي محتاج اجابه
لكن يبدو والله اعلم ان الاجابات تاهت في عالم النسيان
ذى ما تاهت حاجات كتيره
و مازال النيل يجرى
قصدى و مازال التوهان مستمر

نشرت في جريدة الأنباء الدوليه

تستاهل مش كده

في يوم من الايام كنت باشيت علي الياهو و تعرفت علي بنت من صعيد مصر العامر بالخيرات وكان كلامها منمق واسلوبها لذيذ في الكتابه "حاجه غريبه" مش كده!! و ده اللي خلاني اشتاق لسماع صوتها وسمعت صوتها بعد الحاح و كان يا عيني عليه في رقته ودلاله تقولش بلبل بيغرد ما فيش احسن من كده طلبت منها تفتج الكاميرا عشان اعرف شكلها اللي اكيد حيبقي ذي صوتها ما فيش احسن من كده 3 شهور و كوكتيل حجج من عينة "ما عنديش كاميرا في البيت" "السايبر اللي انا فيه ما فيهوش كاميرات" " باشيت من عند واحده صاحبتي" وبدات اشك في الموضوع طب وبعدين قالت لي ما تزعلش حابعت لك صورتي وبدات توصف نفسها و قالت بالحرف الواحد "شعري شعر شريهان -ربنا يشفيها - و عيوني عيون حنان ترك بالملي ومناخيري مناخير سعاد حسني وبقي بق بوسي بالظبط !! و استعديت للمفاجآه ايه ما بعتيش صورتك ليه حا بعتها علي الايميل اوكي استني وكل يوم افتح الايميل و مافيش حاجه وفي يوم لقيت رسالع عنوانها "عروسه لُقطه" اي والله لسه بافتحها بسم الله الرحمن الرحيم بعيد عنكوا وعن السامعين و عينكوا ما تشوف الا النور صورتها تقول للبت ظريفه بتاع ترويض الشرسه والست عائشه الكيلاني ربنا يخليهم لنا قوموا وانا اقعد مطرحكوا وبعت الرد علي السريع "انا موافق اتجوزك بشرط انك تقطمي رقبتك جتك قطم رقبتك" تستاهل مش كده

نشرت في جريدة اضحك للدنيا

أحمد فؤاد نجم علي القمه دائماً

أحلي ما في رمضان 2006 المقدمه والنهايه لمسلسل " حضرة المتهم أبي " واللي كانت بحق أقوي من المسلسل نفسه كتبها ملك الاحساس الصادق أحمد فؤاد نجم يا عم أحمد واسمحلي أقولك عمي لأنك عمي وتاج راسي احساسك فاق الحدود لأنه خارج من آخر نقطه في قلبك الجميل يمس اوتار قلوبنا ويقطر ألم علي قد ما بيوجعنا علي قد ما بيدينا جرس انذار اصحوا وفوقوا شوفوا الدنيا ماشيه ازاي الطيب مهضوم حقه وعايش علي الهامش ويا عيني يا وعدي ع الطيبين فيها

لكل محبي الشاعر الكبير اتشرف بأن تضم مدونتي المتواضعه مقدمة ونهاية مسلسل حضرة المتهم أبي

وتعالوا نشوف الابن بيقول لابوه في المقدمه ايه

المقدمه

نارل و أنا ماشي

ع الشوك برجليا

و أنت السبب ياأبا

يا للي خليت بيا

لا فرشتلي بستان

و لا حتي بر أمان

أعيش عليه انسان

و الدنيا في ايديا

و أنا لما جيت م الغيب

العدل كان كيفي

و الحق كان مطمعي

و الحب كان سيفي

دقيت علي الأبواب

لقتني في السرداب

غابة من الأنياب

مسنونه حواليا

مع الآسف يا أبا

الدنيا دي غابه

مالناش مكان فيها

يا عيني يا وعدي

ع المغرمين بعدي

و الطيبين فيها

شوفوا الجمال

دلوقتي نشوف الأب فيما يشبه الاعتذار لابنه بيقول ايه

النهاية

حقك علي عيني

يا ابني يا نور عيني

لجل الوفا بديني

لك عندي بعض كلام

أنا كنت وحداني

و الدنيا وخداني

عايز ونيس تاني

يصاحبني في الأحلام

غريب و أنا في بلدي

جبتك تكون سندي

انصفني يا ولدي

و اصبر علي الأيام

الستات و الدخان

الست في العشرين سيجاره كيلوباترا لازم تفركها كويس قبل ما تولعها

الست في التلاتين سيجاره مارلبورو أحمر سالكه بس حاميه وكتيرها خطر ع الصحه

الست في الأربعين ذي الشيشه ما تقولش معاك غير بعد رابع حجر

الست في الخمسين ميريت أزرق ما تحسش انك بتدخن

الست في الستين سيجار بيتطفي لوحده

نقلاً عن عمر طاهر

الحريم مراحل

مرحلة الصعلكه يلزمها واحده حريفة صعلكه

مرحلة الرومانسيه يلزمها واحده رقيقه وعنيها ملونه

مرحلة الخيانه يلزمها واحده خاينه بطبعها

مرحلة الخباثه يلزمها واحده تحب الخباثه

مرحلة الاستقرار يلزمها واحده شبه الأمهات

نقلاًعن عمر طاهر

! النهايه

حاسس بقرب النهايه

مع أني ليه ما ابتديتش

سطور و تنتهي الروايه

بايخه و ممله ما تتوصفش

و عجبي

محمد فرج على يكتب : سمراء

سمراء وسمرتها سر جمالها الفتان نظره منها تسلب ألباب آنام شعرها موجات انسيابيه من ابداع المنان همساتها تشعل في القلب البركان عيناها لؤلؤتان شفاتاها لحن رنان يستحيل مع فتنتها النسيان ماذا أفعل حان وقت الفصل بعد الانتظار هل ادعها تمشي وتغادر المكان بلا وداع و أنساها أم أشاركها لعبة القدر

رحيل

رَحلت

دون علمي

تَركت قلبي يتمزق

يا لك من قاس

قلبي ما زال ينض

بحروف اسمك

عيني لا تعرف الا صورتك

أذني لا تعشق الا صوتك

كانت نفسي لا تأمن

الا في حضنك

فأين حضنك

غاب حضنك

و بعدها لم أذق

طعم الأمان

الهاتف البعيد

أسمع صوتها

صوت حبيبتي

ينادي من بعيد

هل من مريد ؟

هل من مجيب ؟

أين الحبيب ؟

و ثورة التساؤلات في أعماقها

!! كثورة المحيط

أين أنت يا منقذي

أين أنت يا ملهمي

هل آن الآوان لأعثر عليك

هل وجودك حقيقه

أم خيال في عالمي الصغير

و صوت ناقوس

يدق في فضاء لا محدود

وحدي

ع الشط قاعد وحدي

حلوه تفوت

قمره تعدي

تأنسني لثواني

و بعدها

تفوتني

! وحدي

عيون حبيبتي

أبحث في كل العيون

عن عيون حبيبتي

تلك العيون المجنونه

التي ستغير مذهبي

! بعد كل هذا العمر

بالرغم من انني لم أراها منذ سنين طوال تقارب ال 15 سنه الا ان صورتها لم تبارح خيالي بجمالها الهادئ الآخاذ و بشرتها البيضاء وخديها الناضخان بدماء الحسن والصحه وعيناها الخضراوين النجلاوين ورموشها شديدة الطول التي تظلل علي عيناها و تحرسهما من كل حسود و أنفها المنمق وشفاتاها الرقيقتين بلونهما الكريزي بكل هذه الدرر التي يجمعها وجه واحد انه وجهها المدور كقرص الشمس وقت الظهيره ولا أنسي تاج جمالها شعرها البني اللامع المسدل علي كتفيها وقوامها المعتدل و قامتها المتوسطه ما بين الطول و القصر ياه بعد كل هذه السنين رأيتها بالأمس متألقة كعادتها دائماُ كانت ترتدي جاكيت بني اللون يكسوه ياقه من الفراء كأنها الملكه بدون ميكياج أو أصباغ تفسد جمالها الرباني نعم هي هي لم يكن بيني وبينها أي علاقه سوي الزماله حيث كنا أطفال بالمرحله الابتدائيه لقد علمت أنها التحقت بكلية الطب وتخرجت منها و أصبحت طبيبة امتياز نعم هي هي أغمضت عيني للحظات ودار أمامهما شريط به أحلام طفولتي التي كانت بجانبها وبعيداُ عنها !! حاولت ان أتابعها ومشيت ورائها لكنني غفوت للحظه عندما سألتني احدي الفتيات الروشين ببجاحه و ميوعه تحسد عليها الساعه كام يا بشمهندس ؟ ثم تلفتت يميناُ ويساراُ أين أين ذهبت آواه ياللا القدر السارق سرقها مني بعد كل هذا العمر للآسف ذابت في الزحام

حدث في 20/2/2003

محمد فرج على يكتب : حاجه تفطر

دي حكاية واحد صاحبي بس صعبان عليا قوى و الحكايه تبدأ أنه عرف بنت مش مهم عرفها ازاى المهم انها كانت بتعامله بمنتهي الرقه وفي نفس الوقت باحترام شديد علي أنها " عذراء الربيع " و ده اكتر أنواع البنات الملتزمه التزاماً من وجهة نظر صاحبي كانت عايشه في دور البنوته اللي بيحمر وشها من الخجل و يظهر لون الدم في خدودها لو شافت صورة بيبي من غير هدوم تصوروا مع ان ده من الطبيعي بيبهات بقي لازم يكونوا من غير هدوم كل اللي كان بيشوفها بلبسها الواسع و فوقه الاسدال كمان ومن غير أي ميك أب حتي في المناسبات العامه و الرسميه أي والله مش مصدقيني أما لو شوفتوها و هي بتمشي و هي حاطه وشها في الأرض قال ايه مكسوفه " اسم الله ع الكسوف " تصدقوا وتأمنوا بمين قولوا بالله انها كانت بتروح تصلي التراويح هي و الست والدتها في أكبر جامع في الحي وطبعاً بيكون هناك عواجيز الزفه و كانت اللي تشوفها مافيش علي لسانها الا " ربنا يخليهالك أدب و جمال وكمال " مش ذي بنات اليومين دول يا رب يوعدها بابن الحلال اللي يسعدها و يريح بالها وتقول هي والست والدتها " أمين يا رب " في سرهم طبعاً كان بيقولي انه لما كانم بيقابلها مع أنها جميلة و هاديه و لبقه لأبعد الحدود كان بيحس أنه مش مرتاح معاها و أنها مخبيه حاجه وبدأ السيكولوجي يشتغل مهو معاه ليسانس اداب علم نفس من بتاع "استراتيجية المبالغه في الضد" يعني لو حد بيعمل حاجه مش ولابد بيحاول يبين قدام الناس عكسها لكنه بيبالغ فيها فتظهر الحقيقه و قال ما بدهاش لازم ابقي علي نور وفكر انه يراقبها وهوب لبس ماسك المراقبه و فضل مستنيها لحد ما نزلت من بيتها و شاف كل حاجه عيني عينيك مشيت في الشارع و ركبت الميكروباص تصوروا نزلت مشيت تاني طلعت في عماره وقعدت 3 ساعات هو ما طلعش وراها بس فضل مستني علي القهوه اللي قدام العماره هوب بصت من البلكونه اللي في الدور التالت برضو عارفينها كانت لابسه ايه قميص نوم شفتشي لونه فوشيا تفتكروا كانت بتعمل ايه هناك

أكيد حاجه تفطر
اللهم اني صائم

نصيحه

نصحتك ياما و قلت كتير
ابعد يا ابني عن المعارضه و طير
د ان فلت من أمن الدوله
حتروح فين من كتبة التقارير
و عجبي

الحياه

ماشيه الحياه علي كيفها و معانده
و الحاله تعبانه مش ناقصه مناهده
و أقول في يوم مسيرها تتعدل
أتاريها عامله مع قلة البخت معاهده
و عجبي

المرايه

بصت في المرايه قالت جمالي خطير
و هو اللي حيخليني أعلي و أطير
فاتت شهور و سنين بصت تاني
لقت صورة أراجوز بطراطير
و عجبي

حاله

راحت تصيع في حواريها
شربت و نامت و خدت بكاويها
و نسيت كل حاجه لحد
ما العمر فات ولا حد حاسس بيها
وعجبي

اللي بالي بالك

اللي بالي بالك عدي بالتزوير
لكن مسيره هيقع دوغرى بالتدوير
ياللي فاكر ان ربك غافل عنك
لأ ربنا عارف كل حاجه و كبير
وعجبي

التلفيق

قالوا التلفيق هو سلو البلد دي
قلنا و ده له قواعد بس بيعدي
صار التلفيق هو الأصل و الصوره
خلي الحمار بدل ما ينهق يقول يا وعدي
و عجبى

الوعد

صداع و صايب كل البشر
يفتح عيون الناس علي كل شر
و ماشيه الدنيا بالمقلوب ليه ما أعرفش
لكن اللى أعرفه م الوعد مافيش مفر
وعجبى

محمد فرج على يكتب : مشاوير

مهما نحاول نهرب م المكتوب
نلقي مصيرنا يقرب لينا
ليل و هموم و قلب حزين
يروي بدمعه عنينا
قاسي علينا زماننا
وليه
قادره كمان ليالينا
مشاوير
بنمشيها في غربة الليل الطويل
مشاوير لا ابتداها بدايه
و لا انتهاها نهايه

طريق السفر

يا طريق السفر
لماذا طلت و طلت
حتي غاب القمر
قدمت كل قرابيني
لكي أصل
فلا قُبلت قرابيني
و مازلت مُنتظر

المرأه دائما مظلومة لماذا ؟

عندما يكون الرجل عضوا في البرلمان يدعي "نائب"
أما المرأه فتدعي "نائبه" أي "مصيبه" و العياذ بالله
عندما يكون الرجل حي يرزق يقال له "حي"
أما المرأه فيقال لها "حيه"أي "أفعي" حفظنا الله من سمومها
عندما يكون الرجل غارق في بحر الهوي يقال عنه "هاوى"
أما المرأه فيقال عنها "هاويه" أي "جهنم"أبعدنا الله عنها و نجانا منها
عندما يحكم الرجل بين الناس يدعي "قاضي"
أما المرأه فتدعي "قاضيه" أي "مميته" وقان الله منها
كم هن مظلومات بنات حواء أجمل الكائنات البيضاوات و الشقراوات و السمراوات في هذه الدنيا

رائحة الأماني

أضناني العشق أضناني
عشقت ولم أبال
هل حن يوما لحالي ؟
هل رد جواب سؤالي ؟
سافرت مع التيار
وظللت في بحور عينيه وحدي000
أحارب00000000000000000
و أوهمت نفسي بأن الانتصار آت000
لا محالة
طرقت أبواب العرافين
ولم أجد دواء لحالي
يا حبيبي000000000000000000
هل كتب القدر نهاية الرواية ؟
هل مر قطار الحنان ؟
هل ذابت الأماني مع الاعصار ؟
هل وهل و ألف علامة استفهام ؟
جمعت كل القواميس
أحرقت كل النواميس
حطمت كل الأعراف
في حبك لم أسأل ما النهايه
ما آخر تلك الحكايا
قدمت كل العطايا
و لم أنل الا الحرمان
وما زلت في انتظار 0000000
رائحة الاماني

انقذيني

حبيبتي
شهران مرا علي فراقنا الأليم
و يُزهر الفل و الياسمين
و القلب صامت حزين
حبيبتي
لم أشعر بمرارة البعد حقا
الا بعد أن ذقت حلاوة اللقيا
حبيبتي
أين أنت يا حبيبة الروح
انقذيني من مر السنين
بنقطة من الحنين
بلمسه من يديك
مثل زهر الياسمين
حبيبتي
أستحلفك بالله
انقذيني

لن أعود

لن أعود
بعد أن قطفت زهور حبنا
و أطفأت شموع فرحنا
و سرقت سنين عمرنا
لن أعود
و ما خيالي اليوم الا أوهام
و أحلام مزقتها الايام
أيام كشفت بيننا ستائر الخداع
و أعادت أسطورة الوداع
الي اللقاء
يا من كنت حبيبتي
لا بل هو الوداع

دوائي الاكيد

حبيبتي
طال الغياب
حبيبتي
طال السهر
حبيبتي
غاب القمر
حبيبتي
قلبي يئن
العمر يجري
وبعدنا
كابوس عمري الوحيد
العمر يجري
وعندك دوائي الاكيد
فحبنا يصرخ
ويطلب المزيد
فهل من مزيد

حكايتي مع الزمان

كان لازم اتكلم عن نفسي اول ما عملت البلوج ده المهم انا ما باحبش اتكلم عن نفسى لكن انا في سطور"محمد فرج علي" بكالوريوس تجاره شعبة محاسبه 1999 كتبت في العديد من الصحف والمجلات ذي جريدة "الجيل" و"الدستور" و"صوت الأمه" و"الاهرام المسائي" و "الحياه المصريه" و"الوطن العربي" و"الانباء الدوليه" و"القاهره" و أخيرا "اضحك للدنيا" والان ادرس في كلية الاعلام جامعه القاهره الفرقه الرابعه وعليا امتحانات يوم الاحد الي جي 29/1 ادعولنا وعلي فكره ده اول موقع ليا او بالاحري الاول والوحيد

آسر القلوب

محمد فرج علي

ابحار وردي

دعيني أُبحر اليكي بزورق من ورود حمراء
زورق لا يعانده الموج ولا تقسي عليه الطبيعه
دعيني أحبك بكل ما أوتيت من مشاعر وأحاسيس
دعيني أحبك حتي تنضب كلماتي
و حتي يجف الحب من ذللك العالم
دعيني أشعر بأنفاسك الساخنه
و دعيها تلفح وجهي فتزيده اشتعالاً
دعيني أقبلك حتي يفرقنا الموت
و ضميني الي صدرك لأسمع دقات قلبك
فتطربني كما لم أُطرب من قبل
دعينا نُقيم كوخاً فوق الغيم
جدرانه من ظلال
وأبوابه من زهور
وحيدين نذوب في أحضان دافئه
و قبلات ساخنه
و ليال عشق لا تنتهي

أحلامنا

كلنا من حقنا نحلم وكلنا عندنا احلام ونفسننا انها تتحقق في يوم من الايام
يا تري الدنيا حتسيبنا نحقق احلامنا
يا ريت تكلموني عن احلامكم
وانا حاكلمكم عن احلامي اللي اتحقق منها واللي مااتحققش

! الدنيا

الدنيا اوضه كبيره للانتظار
فيها ابن ادم زيه زي الحمار
الهم واحد والملل مشترك
ومافيش حمار بيحاول الانتحار
وعجبي