أحلي ما في رمضان 2006 المقدمه والنهايه لمسلسل " حضرة المتهم أبي " واللي كانت بحق أقوي من المسلسل نفسه كتبها ملك الاحساس الصادق أحمد فؤاد نجم يا عم أحمد واسمحلي أقولك عمي لأنك عمي وتاج راسي احساسك فاق الحدود لأنه خارج من آخر نقطه في قلبك الجميل يمس اوتار قلوبنا ويقطر ألم علي قد ما بيوجعنا علي قد ما بيدينا جرس انذار اصحوا وفوقوا شوفوا الدنيا ماشيه ازاي الطيب مهضوم حقه وعايش علي الهامش ويا عيني يا وعدي ع الطيبين فيها
لكل محبي الشاعر الكبير اتشرف بأن تضم مدونتي المتواضعه مقدمة ونهاية مسلسل حضرة المتهم أبي
وتعالوا نشوف الابن بيقول لابوه في المقدمه ايه
المقدمه
نارل و أنا ماشي
ع الشوك برجليا
و أنت السبب ياأبا
يا للي خليت بيا
لا فرشتلي بستان
و لا حتي بر أمان
أعيش عليه انسان
و الدنيا في ايديا
و أنا لما جيت م الغيب
العدل كان كيفي
و الحق كان مطمعي
و الحب كان سيفي
دقيت علي الأبواب
لقتني في السرداب
غابة من الأنياب
مسنونه حواليا
مع الآسف يا أبا
الدنيا دي غابه
مالناش مكان فيها
يا عيني يا وعدي
ع المغرمين بعدي
و الطيبين فيها
شوفوا الجمال
دلوقتي نشوف الأب فيما يشبه الاعتذار لابنه بيقول ايه
النهاية
حقك علي عيني
يا ابني يا نور عيني
لجل الوفا بديني
لك عندي بعض كلام
أنا كنت وحداني
و الدنيا وخداني
عايز ونيس تاني
يصاحبني في الأحلام
غريب و أنا في بلدي
جبتك تكون سندي
انصفني يا ولدي
و اصبر علي الأيام
هناك 3 تعليقات:
نجم هيفضل صوت الحق في رمن الباطل
ندي
طب اسكندريه
حلو قوي قوي يا محمد
ذوقك عالي جدا يا رائع أنت
و علشان كده أنا عندي ليك هدية
أدخل على مدونتي علشان تسمع اغنية نازل و أنا ماشي
و ممكن كمان تحملها من الريل بلاير اللي موجود على الجنب
اللينك اهو
http://daliaziada.blogspot.com
مستنية تشريفي بزيارتك
والله يا داليا انتى اكتر من رائعه وميرسي علي تشريفك ليا بالزيارة
إرسال تعليق