لما غنى حميد الشاعرى " افهم بقى" ماكانش يقصد بيها ان حبيبته اللي مش فهماه تفهمه ابدا ده كان يقصدكوا انتوا و بيكلم كل واحد فيكوا لوحده يقوله " افهم بقى" اذا ماكانش ليك ضهر في البلد دي لازم و حتما ولابد تنضرب علي بطنك وعلي قفاك و لا مؤاخذة فاستعد لانك هتتباس يعني هتتباس قصدي هتنضرب يعني هتنضرب وحاول تكون في حالك قوى جدا خالص مالكش دعوه بأى حاجه في اي حاجه و اتبع سياسه لا اري لا اسمع لا اتكلم و ما تخرجش من بيتكوا خالص و بالمره خدلك علبه ريفو و استريح من حياتك خالص يعني حتخرج تروح فين
اذا كنت خلصت دراسه ما فيش شغل يا توتو الا بكوسه و واسطه و انت طبعا مافيش معاك لا كوسه ولا واسطه تبقي تتنيل علي عين اهلك و تقعد في بيتكوا تلاقيك مامعكش تمن الشاى و الدخان عشان تقدر تقعد علي اي قهوه كحيتي
اذا كنت لسه طالب في الجامعه انصحك نصيحه اخ كبير ومعاه بدل البكالوريوس اتنين بامانه اديها الطارشه و نفض لها و اياك تروح الكليه و تحضر المحاضرات و السكاشن و وجع الدماغ اللي مالوش لازمه ده
نخش علي السياسه اوعى تمشي في مظاهرة من بتوع حركة "بس خلاص" و الناس اللي مخها لاسع دى و تقول " بس خلاص0000 بس خلاص" هتنبح صوتك ع الفاضي و في الآخر مش حيتحصل حاجه و كل حاجه هتفضل ذي ما هى
بلاش تنضم لأى حزب معارض خاصه "حزب بكرة" ليبقي مصيرك ذي الدكتور " آيسر ضلمة" يا عيني عليه و علي جراله لو عايز تنضم لحزب تمام خليك مع الحزب اللى يعملك كارنيه فشر بطاقه الرقم القومى و يطلعك رحلات و معسكرات صيف شتا و يوديك معهد اعداد القادة و لو عندك مواهب صحفيه مكبوته يخليك تكتب في جريدته او حتي جريده او مجلة "روزا" اللي ما حدش بيقراهم و يخلي عندك فكر جديد و تعبر للمستقبل السعيد و كل ده بتلاته جنيه يا بلاش " حزب وداد قلبى" اكبر حزب في البلد دي و اللي يحبنا ما يضربش نار و هي دي السياسه والا فلا
افهم بقى
