سلام على الحشرات و الوحش و البقر
ولا سلام يتلى على الانسان
فى اسفل سافلين هويت يا ابن آدم
و طلعت عليين يا حيوان
مفيش حمار يقطع في جرة زميله
ولا تيران تفتن على تيران
و لا ضبع يتحايل بشركات ُُمُساهمه
و لا غزال ينصب علي الغزلان
و لا غراب ديوث يأجر مراته
و لا بومه عاهره لحمها عريان
و لا كمان خنزير عامل مُرابى
يربط بقرشه رقبه الغلبان
و الديب اذا اتعشى يبيت في جحره
و السبع لو شبع يقول شبعان
قول للمعيز يا معيز بقيتم ملايكه
تاكلوا زباله و تحلبوا البان
غير ابن آدم مين بينهب ما يشبع
و يجحد المعروف و الاحسان
من كل واد جنرال معلق ميداليه
و كل نطع جلنف تاجر سياسه
يكسب بلا سلعه و لا دكان
النصابين كده ليه كتير فى الزمن ده
و ليه بتكرمهم كده يا زمان
و الطيبين قاعدين زي عدمهم
فى معهد الازهر و فى الفاتيكان
فى الشرق فرقه تقوم تهز العمايم
و فى اوربا يرفعوا صلبان
سبحانك اللهم سُخطك علينا
ظاهر فى اجرامنا و فى الطغيان
سلمنا الاكوان جنه ليها ثمر
راح الثمر و اتولعت نيران
زجل المبدع : بيرم التونسى
ليست هناك تعليقات:
إرسال تعليق